Central Sorkar-a Ministry of Agriculture & Farmers' Welfare chuan conference hi huaihawtin, state hrang hranga agriculture minister te sawm an ni a. Nakum Rabi season inpuahchahna hun atan conference hi buatsaih niin, hmalak dan tur te sawi ho-na hun hman a ni.

Agriculture Minister chuan thu sawina hun te neiin, Mizoram-a agriculture sector-in kan mamawh ber chu farm road tha a nih thu a sawi a; Mizoram chu tlang ram kan nih avangin, inkalpawh zung zung a har a. Fur ruahtui a tam chang phei chuan lei a min nasa thin a, farmers te tan pawh harsatna tam tak a thlen thin a ni, a ti. Farm Road tha zawk kan neih theihnan central sorkar tanpuina kan mamawh thu a sawi bawk.

Wet Rice Cultivation hi tunah hectare 8,175-a zau-ah kalpui mek a ni a, heng bakah hian WRC atana la hman theih tur potential area hectare 1,39,372 a la awm thu a sawi. National Mission on Edible Oils - Oil Palm scheme hnuaiah hma an lak mek thu te sawiin, Oil Palm hi Mizoram-ah a tha duh em em a, farm road kan neih that tawk loh avangin oil palm chingtute pawhin harsatna an tawh mek thu a sawi. National Mission on Edible Oils - Oilseeds hnuaiah Rapeseed leh Niger-ah te hma an lak mek thu te sawiin, Rapeseed hi a chi (seedling) quintal 3.76 sem a ni tawh a, Niger pawh a chi quintal 10 sem a ni, ti. Tunah hian district hrang hrangah block demonstration te pawh kalpui mek a nih thu a tarlang bawk.

Tung bikah sorkarin tan a lak chhoh leh mek thu sawiin, Tung promotion atan hian Action Plan Nuai 399.37 chu sanction a awm tawh a, chak zawka hmalak a nih theihnan NMEO-Oilseeds scheme hnuaiah Tung hi telh ve theih ni se tiin Union Agriculture Minister chu a ngen bawk a. Tun dinhmunah hian Saitual, Khawzawl leh Serchhip District-ah te chhungkaw 331-in Tung hi an ching ve mek a, kum 3-4 chhovah chuan a rah tan beisei a ni, a ti.

National Food Security & Nutrition Mission hnuaiah field pea leh rajmah bikah cluster demonstration an kalpui mek thu te leh, rice-pulse cropping an kalpui thu sawiin, thlai chi pawh quintal 24.90 sem a nih tawh thu a tarlang. Rabi Season lo awm turah pawh ICAR-IIPR leh NEH te nen thawk hovin, hma lak chhoh zel tum a ni, a ti.

Minister chuan Cocoa chungchang sawiin, National Cocoa Conclave, Jorhat-a neih takah pawh a tel ve thu te leh, Cocoa hi Mizoram leilung nen a inmil em em a, farmer te sum lakluh a lo tam deuh deuh theih nan, Oil Palm leh Tung nen Cocoa inter-cropping tura hmalak an tum thu a tarlang. Hetiang tur atan hian Cocoa seedling quality tha tak a ngai dawn a, Mizoram-ah ngei ICAR nen tangkawpin nursery hi bun theih ni se, tiin central sorkar thawhpuiah a sawm nghal bawk.

Tlangrama cheng kan nih avangin central scheme tam tak hi a nihna ang taka kalpui a harsa thin a. Chuvangin, kan leilung leh sik leh sa mila Mizoram tan bik scheme duan a tul thu Agriculture Minister chuan sawiin, chutiang tur atan chuan central sorkar puihna an mamawh a ni, a ti.

Agriculture & Farmers' Welfare Department atang hian Minister hi Ramdinliani IAS, Secretary; R. Lalnunzira, Director leh Pu Lalhmingmuana Renthlei, Joint Director te'n an tawiawm, niin vawiina sorkar thuchhuah chuan a tarlang.